پىگمېنتلىق ئۆسۈملۈكلەر—تەركىبىدە تەبىئىي پىگمېنتلار بولغان ، يېمەكلىكلەرگە ، ئۇسسۇلۇقلارغا قوشۇلىدىغان رەڭ خۇرۇچلىرىنى ئالغىلى بولىدىغان ، جۈملىدىن بوياق ماددىلىرىنى ياسايدىغان ئۆسۈملۈكلەر . پىگمېنت–ئۆسۈملۈكلەرنىڭ مېتابولىزم جەريانىدا پەيدا بولىدىغان ھاسىلاتى بولۇپ ، خىمىيىۋى قۇرۇلمىسى ئىنتايىن مۇرەككەپ بولغان ئورگانىك بىرىكمىلەردۇر . بۇلارنىڭ بەزىلىرى يوپۇرماق ۋە غوللاردا مەۋجۇت بولۇپ تۇرىدۇ ، مەسىلەن : ئوسما ، ئۇنىڭ يوپۇرمىقىدا ئىندىگوتىن بولۇپ ، ئۇ كۆك بوياق ماددىسىدۇر ، ئۇنىڭ بىلەن ئۆسۈملۈك تالالىرىنى بويىغاندا تىزاپ ئىشلىتىش ھاجەتسىز، ئۇ گىرىم بۇيۇملىرىغىمۇ ئىشلىتىلىدۇ. بەزى ئۆسۈملۈكلەرنىڭ يىلتىزىدىمۇ پىگمېنتلار ساقلىنىدۇ ، مەسىلەن : ئەڭلىك ئوت ، يىلتىزىدا بىنەپشە قىزىل پىگمېنت ئالكاننىن بولۇپ ، قىزىلگۈل رەڭگىدە ، پاختا ۋە يىپەك توقۇلمىلارنى بويىغىلى ، يېمەكلىك ۋە گىرىم بۇيۇملىرىغا ئىشلەتكىلى بولىدۇ . بەزى پىگمېنتلار گۈل ۋە چېچەكلەردە ساقلانغان ، مەسىلەن : زاراڭزىنىڭ گۈل تاجى تەركىبىدىكى  كارتامىن ماددىسىدىن قىزىل بوياقلارنى ئېلىپ، پاختا رەختلەرنى بويىغىلى ، گىرىم بۇيۇملىرىنى ياسىغىلى ،  ئۇسسۇلۇق ۋە يېمەكلىكلەرگە رەڭ بەرگىلى بولىدۇ .