ئابدۇرەھىم ھەكىمى

1

قول ئۈزگىن بۇرادەر تىلەشتىن  – ‹‹بەر››دىن،
رىسقىڭنى ئىزدىگىن ئەجرىڭدىن – تەردىن.
تەل بولماس توققۇزى تىلەمچىلەرنىڭ،
ئىشلىسەڭ بوسۇغاڭ بولىدۇ زەردىن.

 2

كېلىمىز، كېتىمىز، بۇ بىر ئىرادە،
ئەزرائىل ئىچكۈزەر ھەممىگە بادە.
ئالىمنىڭ ئەمگىكى كۆمۈلمەس ھەرگىز،
ياشايدۇ ئۆمرىدىن نامى زىيادە.

 3

بۇ دۇنيا بىزلەرگە قونالغۇ – ئۆتەڭ،
ئۆتەڭنى تالىشىپ قىلىشمايلى جەڭ.
كېتىمىز قۇرۇق قول، قالىدۇ دۇنيا،
نەپسىڭنى يىغىپ يۈر، كۆڭلۈڭنى تۇت كەڭ.

 4

كۆچەتكە سۇ كېرەك، ئادەمگە غايە،
كۆچەت تىك، كۆكەرسۇن، تاشلىسۇن سايە.
چۆللەرنى باغ قىلىش ئارزۇيىڭ بولسۇن،
بىر كۆچەت تىكسەڭمۇ، ئاشۇ كۇپايە.

 5

تۇغۇلماق ھەم ئۆلمەك بۇ بىر ھەقىقەت،
شۇ قىسقا ئۆمۈرنى بىلەيلى قىممەت.
كەتسەكمۇ قالىدۇ ياخشى نامىمىز،
قىلساق بىز ئاۋامغا ياخشىلىق، خىزمەت.