سالى ئىبراھىم خالس

ئادەمنىڭ بايلىقى ئادىمىي خىسلەت،
خسلەتتۇر ئادەمگە بىباھا سۈپەت.
ئادىمى خىسلەتتىن مەھرۇم بولغانلار
ھايۋاندىن پەرقسىز پەقەت ۋە پەقەت.
×     ×     ×
سۆيۈملۈك بولىسەن سۆيۈشنى بىلسەڭ،
سۆيگۈگە سادىق بوپ، كۆيۈشنى بىلسەڭ.
سۆيۈپ ھەم سۆيۈلۈپ مەنىلىك ياشا،
چىن سۆيگۈ قەدىرىنى ھەقىقي بىلسەڭ.

ئىنسانىي خىسلەتتۇر ھەقنى سۆزلىمەك،
ھەم يەنە ھەر ئىشتا ئەلنى كۆزلىمەك.
ئۆزىنى چىن ئىنسان دېگەن ھەر كىشى،
ئەل بىلەن تەقدىرداش بولمىقى كېرەك.
×     ×     ×
ئۆملۈكتۇر ئۇل تېشى زەپەر قۇچۇشنىڭ،
ھەم يەنە گۈللىنىپ رۇناق تېپىشنىڭ.
گەر ئەلدە بولمىسا ئۆملۈك  –  ئىناقلىق،
ئايىغى چىقمايدۇ ھىچقانداق ئىشنىڭ.
