ئابلىز ئۆمەر ھاجى

كۆركى سىلەر تىرىكلەرنىڭ، سورۇنلارنىڭ، ياشانغانلار،
دانىشمىنى چوڭلاۋاتقان بوغۇنلارنىڭ، ياشانغانلار.
سىلەر سىز ھېچ تەمى بولماس يېگەن – ئىچكەن ئاش – تائامنىڭ،
چىلان، ئۈزۈم، تاۋۇز، جىگدە، قوغۇنلارنىڭ، ياشانغانلار.

سىلەر بىلەن ئويناق يۈرەك، قوۋناق ھايات، بەردەم قانات،
سىلەر دېگەن ئەجدادلارنىڭ ۋارىسلىرى، چىراغلىرى.
سىلەر بىلەن ياشناپ تۇرار ئېتىز – باغلار، چىمەن – تاغلار،
ئۆرنەك سىلەر، ئەينەك سىلەر، ئەلۋەك ئەقىل قىرغاقلىرى.

قىرغاقلارنى بويلاپ ئاقار ئېقىن سۇلار يىراقلارغا،
ۋارس بولۇش ئەھدىمىزدۇر ئەۋلادسېرى ئىزىڭلارغا.
قەلبىڭلاردا تالاي ئىستەك، نىشان، ئارمان، مىراسلار بار،
پۇلنى ئەمەس قالدۇرۇڭلار شۇنى ئوغۇل – قىزىڭلارغا.

تەمەسىز مەن مال – دۇنيادىن، ماڭا پەقەت ئەقىل كېرەك،
ئەقىل بىلەن ئىز قالدۇرسام دەيمەن شۇڭا سىلەر ئوخشاش.
ئەقىل ئىزى قالغانلارنى مەڭگۈ ئەزىز، ئۇلۇغ دەر ئەل،
سىلەرنىڭ ئىز – روھىڭلار بىز بوغۇنلارغا ئۆچمەس قۇياش.

قەدىرلەيلى، ئۇلۇغلايلى بوۋايلارنى، مومايلارنى،
سالامەتلىك، ئۇزاق ئۆمۈر ھەمراھ بولغاي ئۇلۇغلارغا.
تۆھپە، ئەجىر ئۇنتۇلمايدۇ مەڭگۈ ياشار يۈرەكلەردە،
قەسەميادكىم ۋارىستۇرمىز مۇبارەك ھەر ئىزىڭلارغا.
