بەدەل ئارت قەدىمكى تۇرى : تاڭ سۇلالىسى دەۋرىدىكى سۇلۇ تۇرىنىڭ ئەسلى ئورنى . بۇ ئۈچتۇرپان ناھىيىسىنىڭ غەربىي جەنۇبىدىكى بەدەل داۋىنىنىڭ ئېتىكىگە جايلاشقان . قەدىمكى تۇرنىڭ كەينىدە تەڭرىتاغ ، يېقىن ئەتراپىدا بەدەل دەرياسى بولۇپ ، يەر تۈزۈلۈشى بىر قەدەر ئېگىز ، كەڭ دائىرنى كۆرگىلى بولىدۇ . قەدىمكى تۇرنىڭ ئۇلى 10 × 13 مېتىر ، قالدۇق ئېگىزلىكى يەتتە مېتىردىن ئارتۇق كېلىدۇ . بۇ تۇرنىڭ ئاساسلىق گەۋدىسى خاڭدالغان توپا بىلەن شېخىل قاتلىمىدىن ئىبارەت بولۇپ ، ئۇلارنىڭ ئارىسىغا ياغاچ ۋە يۇلغۇن باستۇرۇلغان . خاڭدالغان قاتلامنىڭ قېلىنلىقى 12سانتىمېتىرغىچە كىلىدۇ . قەدىمكى تۇرنىڭ ئۈستىدە ياغاچ كۈمۈر كۈلى بار . بۇ تۇردىن بەش كىلومېتىر يىراقلىقتا يەنە بىر قەدىمىي تۇر بولۇپ ، ئۈستىدە بىر نەچچە تال ياغاچ تۈۋرۈك بار . بۇ تۇرلارنى بويلاپ داۋاملىق ئالدىغا ماڭغاندا ، بەدەل داۋىنىدىن ئاشقىلى بولىدۇ . قەدىمقى تۇرنىڭ يېقىن ئەتراپىدا قەدىمىي قەبرىستانلىق ۋە تۆگە ، ئات ، ئېشەكلەرنىڭ سۆڭەكلىرى بايقالدى . تۇرنىڭ شېخىل قاتلىمىدىكى ياغاچلارنىڭ يىلىنى كاربون 14ئارقىلىق ئۆلچەش نەتىجىسىگە ئاساسلانغاندا ، ئۇلارنىڭ دەۋرى بۇنىڭدىن 1645 يىل بۇرۇن بولۇپ ، تاڭ سۇلالىسى دەۋرىدىن بۇرۇنقى ۋاقىتلارغا توغرا كېلىدۇ . بەدەل داۋىنىدىكى قەدىمكى يول ،خەن سۇلالىسى دەۋرىدىن تارتىپ ، تارىم ئويمانلىقىنىڭ غەربىي شىمالىدىن سۇياب دەرياسىغا بارىدىغان مۇھىم يول بولۇپ ، ‹‹يېڭى تاڭنامە . جۇغراپىيە تەزكىرىسى››دە خاتىرلەنگەن سۇلۇ تۇرى قەدىمكى يولى بىلەن ماس كېلىدۇ .