قەشقەر شەھىرىنىڭ كونا شەھەر رايونى 1902–يىلى قاتتىق يەر تەۋرەشتىن كېيىنكى خارابىلىك ئۈستىگە قۇرۇلغان . كونا شەھەر رايونىنىڭ كۆلىمى 8.36 كۋادىرات كىلومېتىر بولۇپ ، 65 مىڭ ئائىللىك ، 221 مىڭ نوپۇس بار ، بۇ شەھەر ئومومىي نوپۇسىنىڭ %50 نى ئىگەللەيدۇ. قەشقەر شەھىرىنىڭ كونا شەھەر رايونىدىكى ئۆيلەرنىڭ كۆپىنچىسى ئامما ئۆز پىلانى بويىچە سالغان ئۆيلەر بولۇپ، يەر تەۋرەشكە تاقابىل تۇرۇش ئىقتىدارى ئاجىز ، ئۇنىڭ ئۈستىگە كونا شەھەر رايونىدىكى ئۆيلەرنىڭ ئاستىدا مەدەنىيەت ئىنىقىلابى مەزگىلىدە قېزىلغان 35 كىلومېتىر ئۇزۇنلۇقتا يەر ئاستى لەخمىسى بولۇپ، بۇ بۇ رايونغا نىسبەتەن بىر يوشۇرۇن خەۋپ بولۇپ كەلمەكتە. كونا شەھەر رايونىدىكى كوچىلار تار ، ئۇزۇن ، كوچا ئۈستىدە لەمپە ئۆيلەر بولۇپ ، جىددىي ئەھۋال يۈز بېرىپ قالسا ، 120 جىددىي قۇتقۇزۇش ماشىنىسى ، 119 ئوت ئۆچۈرۈش ماشىنىسىنىڭ كىرىشى مۇمكىن ئەمەس. بۇ رايونلارنىڭ يەر تۈزۈلىشى بەك مۇرەككەپ بولغاچقا ، ئاھالىلەرگە تەبىئي گاز ، پار ، كېرەكسىز سۇلارنى بىر تەرەپ قىلىش ئەۋرەز يولى ، سىملىق تېلېۋىزور قاتارلىق زامانىۋىي تۇرمۇش ئەسلىھەلىرىنى ئورۇنلاشتۇرۇشتا قىيىنچىلىق بەك ئېغىر.