20 كىشىدىن تەركىپ تاپقان شىنجاڭ ۋەكىللەر ئۆمىكى روسىيىنىڭ يېڭى سبېرىيە شەھىرىدە بۈگۈن(16 – سېنتەبر) باشلىنىدىغان شىنجاڭ پەن – تېخنىكا نەتىجىلىرىنى تونۇشتۇرۇش يىغىنى ۋە شىنجاڭ سۈرەتلەر كۆرگەزمىسىگە قاتنىشىش ئۈچۈن، تۈنۈگۈن(15 – سېنتەبر) كەچتە يولغا چىقتى.

     روسىيە پەنلەر ئاكادېمىيىسى سبېرىيە شۆبىسى بىلەن شىنجاڭنىڭ پەن – تېخنىكا ساھەلىرىدىكى ھەمكارلىقىنىڭ بىر – بىرىنى تولۇقلاش خاراكتېرى ئىنتايىن كۈچلۈك بولۇپ، ئىككى تەرەپنىڭ پەن – تېخنىكا نەتىجىلىرىنى ئۆتۈنۈپ بېرىش، مۇتەخەسسىسلەرنى ئۆز ئارا زىيارەت قىلىش، پەن – تېخنىكا ئۇچۇرلىرىنى ئالماشتۇرۇش قاتارلىق تەرەپلەردىكى ھەمكارلىقى كۈنسىرى كۈچىيىپ، ھەمكارلىق ساھەلىرى ئۈزلۈكسىز كېڭىيىپ، ھەمكارلىقتا ماھىيەت خاراكتېرلىك نەتىجىلەر قولغا كەلتۈرۈلدى.

     شىنجاڭ پەن – تېخنىكا نەتىجىلىرىنى تونۇشتۇرۇش يىغىنىنى پەن – تېخنىكا مىنىستىرلىكى، ئاپتونوم رايونلۇق پەن - تېخنىكا نازارىتى بىلەن روسىيە پەنلەر ئاكادېمىيىسى سبېرىيە شۆبىسى ئۇيۇشتۇرغان بولۇپ، تونۇشتۇرۇش يىغىنى نېفىت خىمىيە سانائىتى، يېڭى ئېنېرگىيە، يېزا ئىگىلىك ماشىنا – سايمانلىرى، پەن – تەتقىقات ئۈسكۈنىلىرى، بىناكارلىق – قۇرۇلۇش ماتېرىياللىرى قاتارلىق ساھەلەردىكى 30 دىن كۆپرەك تۈر ۋە شىنجاڭ ئەھۋالىنى چۈشەندۈرىدىغان سۈرەتلەر كۆرگەزمىسىگە چېتىلىدۇ. تونۇشتۇرۇش يىغىنىغا روسىيە غەربىي سبېرىيىدىكى ئالاقىدار پەن – تەتقىقات ئورۇنلىرى، ئالىي مەكتەپلەرنىڭ مۇتەخەسسىسلىرى ۋە كارخانىچىلار تەكلىپ قىلىنىدۇ. ۋەكىللەر ئۆمىكىدىكىلەر روسىيە يېڭى سبېرىيىنىڭ پەن – تەتقىقات ئورۇنلىرى، كارخانىلىرىنى ئېكسكۇرسىيە قىلىدۇ، زىيارەت قىلىدۇ ھەمدە ئېلىمىزنىڭ روسىيىنىڭ تېخنىكىسىغا بولغان ئېھتىياجى ۋە ھەمكارلىقنى يەنىمۇ قانات يايدۇرۇش توغرىسىدا تەكلىپ بېرىدۇ.

     ئىگىلىنىشىچە، روسىيە پەنلەر ئاكادېمىيىسى سبېرىيە شۆبىسى 2007 – يىلى ئۆكتەبردە ئۈرۈمچى شەھىرىدە پەن –  تېخنىكا نەتىجە تۈرلىرىنى تونۇشتۇرۇش يىغىنىنى ئۆتكۈزگەن.