تۈنۈگۈن(26–ئاۋغۇست) چۈشتىن بۇرۇن ئېچىلغان ئاپتونوم رايونلۇق 2–قېتىملىق مەملىكەت بويىچە ئىقتىسادنى ئومۇميۈزلۈك تەكشۈرۈش ئىشخانىلىرى مۇدىرلىرى يىغىنىدىن ئىگىلىنىشىچە ، ھازىردىن باشلاپ 12–ئاينىڭ باشلىرىغىچە ، ئاپتونوم رايونىمىز ئىقتىسادنى ئومۇميۈزلۈك تەكشۈرۈشنى تىزىملىتىشتىن بۇرۇنقى بارلىق تەييارلىق خىزمىتىنى تاماملاپ بولىدىكەن ، نۆۋەتتە ، ھەر قايسى ئورۇنلار تېگى–تەكتىنى ئېنىقلاش خىزمىتى باسقۇچىغا قەدەم قويغان.     

      ئىگىلىنىشىچە ، بۇ قېتىمقى ئىقتىسادنى ئومۇميۈزلۈك تەكشۈرۈش خىزمىتى ئاپتونوم رايونىمىزدىكى تەخمىنەن 150 مىڭ قانۇنىي ئىگىلىك ئورۇن ۋە كەسىپلەر پائالىيىتى ئورنىغا ، شۇنداقلا تەخمىنەن 600 مىڭدىن كۆپرەك يەككە تىجارەتچىگە چېتىلىدىكەن . ئاپتونوم رايونىمىز بويىچە 1400 دىن كۆپرەك يېزا ، بازار ، مەھەللە باشقارمىسى ۋە دۆلەت ئىگىلىكىدىكى دېھقانچىلىق ، چارۋىچىلىق تۈەن–مەيدانى ، 14 مىڭدىن كۆپرەك كەنت ، مەھەللە كومىتېتى ۋە ليەندۈيلەردە ئىقتىسادنى ئومۇميۈزلۈك تەكشۈرۈشنى تىزىملاش خىزمىتى قانات يايدۇرۇلىدىكەن . نۆۋەتتە ، جايلاردا ئىقتىسادنى ئومۇميۈزلۈك تەكشۈرۈشكە رەھبەرلىك قىلىش گۇرۇپپىلىرى ۋە ئىشخانىلىرى قۇرۇلۇپ بولۇنغان .