گوۋۇيۈەننىڭ مۇئاۋىن زۇڭلىسى جاڭ دېجياڭ 31 – ئىيۇل جۇڭنەنخەيدىكى بىنەپشە راۋاقتا ، ئامېرىكا خۇيپۇ شىركىتىنىڭ باش مۇدىرى قوشۇمچە باش ئىجرائىيە ئەمەلدارى ماك خېد ۋە ئۇنىڭ ھەمراھلىرى بىلەن كۆرۈشتى . جاڭ دېجياڭ خۇيپۇ شىركىتىنىڭ كۆپ يىللاردىن بۇيان ، جۇڭگو ئۇچۇرچىلىق سانائىتى ساھەسىدىكىلەر بىلەن ھەمكارلىقنى قانات يايدۇرغانلىقىغا يۈكسەك باھا بېرىپ ، خۇيپۇ شىركىتىنىڭ جۇڭگونىڭ ئوتتۇرا ۋە غەربىي قىسىم رايونلىرىدا كەسىپ ۋە مەبلەغ سېلىش دائىرىسىنى پائال كېڭەيتكەنلىكىنى ئالقىشلاپ ، بۇ بىر قوش نەپ بېرىدىغان تەدبىر دېدى. ئۇ يەنە مۇنداق دېدى: جۇڭگو ھۆكۈمىتى ئىسلاھات، ئىشىكنى سىرتقا ئېچىۋېتىش سىياسىتىدە داۋاملىق چىڭ تۇرۇپ، خۇيپۇ شىركىتى قاتارلىق چەتئەل شىركەتلىرىنىڭ جۇڭگودا مەبلەغ سېلىشى ۋە ھەمكارلىقنى كۈچەيتىشى شۇنداقلا كېڭەيتىشىگە مەدەت بېرىدۇ ۋە ئۇنى قوللايدۇ.