كۆپ يەر تەۋرەيدىغان ئۈچتۇرپان ناھىيىسىنىڭ تاغلىق رايونلىرىدىكى چارۋىچىلار بۇنىڭدىن كېيىن تۈزلەڭ رايوندىكى دېھقانلارغا ئوخشاش يەر تەۋرەشكە چىداملىق بىخەتەر ئۆيلەردە خاتىرجەم ئولتۇرالايدىغان بولدى . ئوخشىمىغان يېرى بۇ ئۆيلەر ياغاچتىن قۇراشتۇرۇلغان ، ئىسسىقلىق ساقلىيالايدىغان ھەرىكەتچان ئۆي بولۇپ ، ھەممە چىقىمىنى ھۆكۈمەت ئۈستىگە ئالغان .

     ئۈچتۇرپان ناھىيىسىنىڭ تاغلىق رايونلىرىدىكى قىرغىزلارنى ئاساس قىلغان چارۋىچىلار يول ، سۇ ، توك راۋان بولمىغان چەت–ياقا جايلاردا تارقاق ئولتۇراقلاشقان بولۇپ ، ئۇلارغا خىش ، بېتون ، ياغاچ قۇرۇلمىلىق يەر تەۋرەشكە چىداملىق بىخەتەر ئۆي سېلىپ بەرگەندە قۇرۇلۇش تەننەرخى نەچچە ھەسسە ئۆرلەپ كېتەتتى . شۇڭا ناھىيە رەھبەرلىرى تەكرار ئىزدىنىش ، تەتقىق قىلىش ئارقىلىق ئۇلارغا ھەرىكەتچان ياغاچ ئۆي ياساپ بېرىش لايىھىسىنى تۈزۈپ ، بۇ يىل 30 ئائىلىلىك چارۋىچىنى بۇ خىل يېڭى ئۆيگە كۆچۈرۈشنى پىلانلىغان . ھەر بىر يۈرۈش ئۆينىڭ كۆلىمى 60 كۋادىرات مېتر چوڭلۇقىدا پىلانلىنىپ ، جەمئىي 1 مىليون يۈەن مەبلەغ ئەمەلىيلەشتۈرۈلگەن . بۇنىڭ %70 ى يەر تەۋرەشكە چىداملىق بىخەتەر ئۆي مەخسۇس مەبلىغىدىن ، %30 ى ناھىيە مالىيىسىدىن ئاجرىتىلغان . ھەر بىر يۈرۈش ئۆينىڭ ئەتراپىغا قۇدۇق قېزىلىپ ، ئادەم ۋە چارۋىلارنىڭ ئىچىدىغان سۇ مەسىلىسى بىرلا ۋاقىتتا ھەل قىلىش ئورۇنلاشتۇرۇلغان .

      نۆۋەتتە ، ئۈچتۇرپان ناھىيىسىدە 30 ئائىلىلىك چارۋىچىغا بىخەتەر ھەرىكەتچان ياغاچ ئۆي ياساپ بېرىش قۇرۇلۇشى جىددىي ئېلىپ بېرىلماقتا ئىكەن.