ئاپتونوم رايون جەنۇبىي شىنجاڭدىكى ئۈچ ۋىلايەت، ئوبلاستنىڭ 7 مىليون مو يېرىنى ئېچىپ، رەتلەپ، يەر بايلىقىنىڭ جەنۇبىي شىنجاڭنىڭ ئىمكانىيەتلىك سىجىل تەرەققىياتىغا كاپالەتلىك قىلىش ئىقتىدارىنى ئۆستۈرۈش ئۈچۈن، يېقىندا، ‹‹جەنۇبىي شىنجاڭدىكى ئۈچ ۋىلايەت، ئوبلاستنىڭ يەر بايلىقىنى ئېچىش، رەتلەش قۇرۇلۇشىنى يولغا قويۇش لايىھىسى›› نى ئېلان قىلدى.

  ‹‹لايىھە›› دە مۇنۇلار ئوتتۇرىغا قويۇلدى: تېرىلغۇ يەر كۆلىمىنى ئۈنۈملۈك ئاشۇرۇش بىلەن بىرگە، تېرىلغۇ يەر سۈپىتىنى ئۆستۈرۈشكە ئەھمىيەت بېرىش، شورلىشىپ كەتكەن يەرلەرنى رەتلەش بىلەن سۇچىلىق قۇرۇلۇشى، سوتسىيالىستىك يېڭى يېزا قۇرۇلۇشىنى ئۆز ئارا بىرلەشتۈرۈشتە چىڭ تۇرۇپ، سۇ بايلىقى ئالاھىدىلىكىگە ئاساسەن، سۇغا قاراپ يەر بەلگىلەش، سۇ بىلەن يەرنىڭ تەڭپۇڭلۇقىنى ساقلاش پرىنسىپىنى ئىزچىللاشتۇرۇپ، سۇ بايلىقىدىن ئىمكانىيەتلىك سىجىل پايدىلىنىش، يۇقىرى ئۈنۈمدە پايدىلىنىش ئارقىلىق،  ئۈچ ۋىلايەت، ئوبلاستتىكى قۇرۇلۇش رايونىدىكى يەرلەرنى ئېچىش، رەتلەشكە ھەقىقىي كاپالەتلىك قىلىش كېرەك. جەنۇبىي شىنجاڭنىڭ 7 مىليون مو يېرىنى ئېچىش، رەتلەش قۇرۇلۇشى يولغا قويۇلغاندىن كېيىن، شۇ يەرنىڭ يېزا ئىگىلىك تېرىقچىلىق قۇرۇلمىسى، زىرائەت مەھسۇلات مىقدارى ۋە سۇ بايلىقىدىن پايدىلىنىش، دېھقان، چارۋىچىلارنىڭ ئىشلەپچىقىرىش، تۇرمۇش شارائىتى زور دەرىجىدە ياخشىلىنىدۇ.