بېيجىڭ ئولىمپىك تەنھەرىكەت مۇسابىقىسى مەزگىلىدىكى يولۇچى توشۇش بىخەتەرلىكىگە كاپالەتلىك قىلىش ئۈچۈن ، 7–ئىيۇل ، جۇڭگو پۇقراۋى ئاۋىئاتسىيىسى ئىدارىسى 20–ئىيۇلدىن باشلاپ ، دۆلەت ئىچىدىكى ئۈرۈمچى ئايروپورتىنى ئۆز ئىچىگە ئالغان نەچچە ئونلىغان ئايروپورتتا ئالاھىدە تەكشۈرۈش تەدبىرى قوللىنىش قارارىنى چىقارغان . كىچىك قۇتىلىق گىرىم بۇيۇملىرىنى ئۆز ئىچىگە ئالغان بارلىق سۇيۇق ھالەتتىكى بۇيۇملار چوقۇم ھاۋالىلىك توشۇشقا بېرىلىشى كېرەك . پىچاق ، ھاراق ، ئوت تۈرىدىكى بۇيۇملارنى يېنىدا ئېلىشقىمۇ ، ھاۋالىلىك توشۇشقا بېرىشكىمۇ بولمايدۇ .

      ئىگىلىنىشىچە ، ئۈرۈمچى ئايروپورتى ئىجرا قىلىدىغان بىخەتەرلىك تەدبىرلىرىدىن يەنە مۇنۇلار بار ئىكەن : ئايروپورتقا يولۇچىلارنى ئۇزاتقىلى كەلگەنلەرنىڭ ئايروپورت بىناسىغا كىرىشىگە بولمايدۇ ، پەقەت ئايروپىلان بېلىتى بار يولۇچىلارنىڭلا ئايروپورتقا كىرىشىگە يول قويۇلىدۇ ؛ ئۈرۈمچى خەلقئارا ئايروپورتىدا يولۇچى كۈتۈۋالىدىغانلارنىڭ ئايروپورت بىناسىغا كىرىشىگە رۇخسەت قىلىنىدۇ ، لېكىن ھەرقانداق تىپتىكى خالتىلىق بۇيۇملارنى ئېلىپ كىرىشى چەكلىنىدۇ . خەلقئارالىق نۆۋەتچى ئايروپىلانغا ئولتۇرىدىغان يولۇچىلار چوقۇم ئايروپىلان بېلىتى بىلەن پاسپورتىنى كۆرسىتىپ ئاندىن ساقلاش زالىغا كىرىشى كېرەك .