نېفىت ئېكىسپورت قىلغۇچى دۆلەتلەر تەشكىلاتىنىڭ نۆۋەتچى رەئىسى ئالجىرىيىنىڭ ئېنېرگىيە ۋە كانچىلىق مىنىستىرى ساجىب خەلىل يېقىندا مۇنداق دېدى : غەربنىڭ ئىران بىلەن بولغان مۇناسىۋىتىنىڭ ياخشىلىنىشى ۋە ئامېرىكا دوللىرى كۇرسىنىڭ چۈشۈشىنى تىزگىنلەش نېفىت باھاسىنى مۇقىملاشتۇرىدىغان ئاچقۇچ .

     شۇ كۈنى خەلىل دۇنيا نېفىت يىغىنىنىڭ ئاخبارات ئېلان قىلىش يىغىنىدا مۇنداق دېدى : نېفىت باھاسىنىڭ يېڭى رىكورتلارنى يارىتىشىنى جۇغراپىيىلىك سىياسىي ۋەزىيەتتىن ، بولۇپمۇ غەرب ئەللىرىنىڭ ئىران بىلەن بولغان جىددى مۇناسىۋىتىدىن ۋە ئامېرىكا دوللىرى كۇرسىنىڭ چۈشۈشىدىن پەيدا بولغان ھايانكەشلىك بازىرىدىن كۆرۈشكە بولىدۇ . ئۇنىڭدىن باشقا ، بەزى دۆلەتلەرنىڭ بىئو يېقىلغۇلارنى كېڭەيتىشىمۇ نېفىت باھاسىنىڭ ئۆسۈشىدىكى سەۋەبلەرنىڭ بىرى . خىلىل ئاگاھلاندۇرۇپ مۇنداق دېدى : ئەگەر ئىران مەسلىسىنى ھەل قىلىدىغان يولنى تاپالماي ، نېفىت ئىشلەپچىقىرىدىغان بۇ مۇھىم دۆلەتكە بولغان ئۇرۇش تەھدىدىنى يوقاتمىساق ، خەلقئارادا نېفىتنىڭ باھاسىنى چۈشۈرگىلى بولمايدۇ ، چۈنكى ئىران ئۇرۇش تەھدىدىگە ئۇچرىغان ھامان نېفىت ئېكىسپورت قىلىشنى توختىتىدۇ .

     ئۇ مۇنداق دېدى : نېفىتنىڭ باھاسىنى مۇقىملاشتۇرىمىز دەيدىكەنمىز ، خۇغراپىيىلىك سىياسىي جەھەتتە تەدبىر قوللىنىشىمىز ۋە ئامېرىكا دوللىرى كۇرسىنىڭ چۈشۈپ كېتىشىدىن ساقلىنىشىمىز كېرەك .

     خەلىل شۇ كۈنى نېفىت باھاسىنىڭ ئۆسۈشىنى نېفىت ئىشلەپچىقىرىدىغان دۆلەتلەر نېفىت بىلەن يېتەرلىك تەمىنلىمەسلىكى بىلەن مۇناسىۋەتلىك ئىكەنلىكىنى يەنە بىر قېتىم ئىنكار قىلدى . ئۇ مۇنداق دەپ كۆرسەتتى : ھازىرقى يۇقىرى باھا نېفىت ئىشلەپچىقىرىدىغان دۆلەتلەرنىڭ مەنپەئىتىگە ئۇيغۇن كەلمەيدۇ ، چۈنكى يۇقىرى باھالىق نېفىت ئېھتىياجنى پۈتۈنلەي بۇزۇپ تاشلايدۇ .

شىنخۇا ئاگېنتلىقى