|
ج ك پ مەركىزىي كومىتېت سىياسىي بيۇروسىنىڭ ئەزاسى، ئاپتونوم رايونلۇق پارتكومنىڭ شۇجىسى ۋاڭ لېچۈەن 24 – ئىيۇن كەچتە، دۆلىتىمىزنىڭ ئافغانىستاندا تۇرۇشلۇق باش ئەلچىسى ياڭ خۇلەن ۋە ئۇنىڭ رەپىقىسى بىلەن كۆرۈشتى.
ۋاڭ لېچۈەن ياڭ خۇلەن ۋە ئۇنىڭ رەپىقىسىنى قارشى ئالدى، باش ئەلچىنىڭ شىنجاڭ خىزمىتىگە ئۇزاقتىن بۇيان كۆڭۈل بۆلۈپ ۋە قوللاپ كەلگەنلىكىگە رەھمەت ئېيتتى. ئۇ باش ئەلچى بىلەن باش ئەلچىخانىنىڭ قوللىشى ۋە ياردىمىدە شىنجاڭنى سىرتقا تەشۋىق قىلىش سالمىقىنى يەنىمۇ ئاشۇرۇپ، چېگرا سىرتىدىكى تېخىمۇ كۆپ كىشىگە شىنجاڭنىڭ ئىقتىسادىي، ئىجتىمائىي تەرەققىيات ئەھۋالىنى بىلدۈرۈشنى، شۇنىڭ بىلەن بىللە، ئافغانىستان بىلەن بولغان ئىقتىساد، سودا قاتارلىق ساھەلەردىكى ئالماشتۇرۇش ۋە ھەمكارلىقنى كۈچەيتىپ، ئىككى تەرەپنىڭ ئورتاق تەرەققىي قىلىشىغا تۈرتكە بولۇشنى ئۈمىد قىلدى.
|
