‹‹ئومۇمىي خەلق كىتاب ئوقۇش پائالىيىتى››گە پائال ماسلىشىش ئۈچۈن، ئاخبارات –  نەشرىيات باش مەھكىمىسى يېقىندا پۈتۈن مەملىكەتتىكى ئۆسمۈرلەرگە 101 خىل گېزىت – ژۇرنالنى تەۋسىيە قىلدى. ئاپتونوم رايونىمىزدىن شىنجاڭ مائارىپ نەشرىياتى نەشر قىلىۋاتقان ‹‹پەرۋاز›› ژۇرنىلى تەۋسىيە قىلىنغان گېزىت –  ژۇرناللار قاتارىدىن ئورۇن ئالدى.

   بۇ پائالىيەت 2 – ئايدا باشلانغان بولۇپ، پائالىيەتكە قاتناشتۇرۇلغان گېزىت – ژۇرناللارنى ئۆلكە، ئاپتونوم رايون، بىۋاسىتە قاراشلىق شەھەرلىك ئاخبارات – نەشرىيات ئىدارىلىرى، مۇناسىۋەتلىك مىنىستىرلىك، كومىتېتلار، ئالاقىدار خەلق تەشكىلاتلىرىنىڭ گېزىت – ژۇرناللارنى باشقۇرغۇچى تارماقلىرى تەۋسىيە قىلغان. دۆلەت ئاخبارات – نەشرىيات باش مەھكىمىسىنىڭ گېزىت – ژۇرناللارنى باشقۇرۇش مەھكىمىسى بالىلار تەربىيىسى مۇتەخەسسىسلىرى، نەشرىيات ساھەسىدىكى نوپۇزلۇق زاتلار ۋە ئۆسمۈر ئوقۇرمەنلەردىن باھالاش گۇرۇپپىسى تەشكىللەپ، ئىنچىكە، ئادىل باھالاش ئارقىلىق، ئۆسمۈرلەرنىڭ ئوقۇشىغا ‹‹پەرۋاز›› ژۇرنىلى قاتارلىق 74 خىل ژۇرنالنى، ‹‹جۇڭگو ئۆسمۈرلىرى گېزىتى›› قاتارلىق 27 خىل گېزىتنى تەۋسىيە قىلدى.
