ئاپتونوم رايونلۇق تەرەققىيات– ئىسلاھات كومىتېتىنىڭ تونۇشتۇرۇشىچە : 2002– يىلىنىڭ ئاخىرلىرى ئېلىمىزدا ئېنېرگىيە ، خام ماتېرىيال باھاسى زور دەرىجىدە ئۆرلىگەندىن بۇيان ، ئاپتونوم رايونىمىزنىڭ كان ئېچىش كەسپىگە مەبلەغ سېلىش تېز سۈرئەتتە ئېشىپ ، ئاپتونوم رايونىمىزنىڭ مۇقىم مۈلۈككە ئوتتۇرىچە مەبلەغ سېلىش سەۋىيىسىدىن زور دەرىجىدە ھالقىپ كەتكەن. بۇ يىل 1– ئايدىن 4– ئايغىچە، ئاپتونوم رايونىمىزنىڭ كان ئېچىش كەسپىگە 8 مىليارد 150 مىليون يۈەن مەبلەغ سالغان بولۇپ، بۇلتۇرنىڭ ئوخشاش مەزگىلدىكىدىن %16.1 ئاشقان. ئاپتونوم رايونىمىزنىڭ كان ئېچىش كەسپى سېلىنمىسىنىڭ ئېشىشىغا تۈرتكە بولغان كۈچ مەملىكەت ئىچى– سىرتىدىكى چوڭ كارخانا گۇرۇھلار ئىكەن. ئاپتونوم رايونىمىز مول بايلىق زاپىسىغا ئىگە رايون بولۇپ ، كان ئېچىش كەسپىدە چوڭ كارخانا ، چوڭ گۇرۇھلار ئاساس قىلىنغان مەبلەغ سېلىش ئەندىزىسى شەكىللىنىدىكەن ، بۇ ئاپتونوم رايونىمىزنىڭ بايلىق ئەۋزەللىكىنى ئىقتىسادىي ئۈستۈنلۈككە ئايلاندۇرۇش قەدىمىنى تېزلىتىپ، مەملىكەت بويىچە ئىنتايىن مۇھىم بولغان بايلىق تىپىدىكى كەسپلەر توپىنى شەكىللەندۈرۈدىكەن.