ئۈرۈمچى شەھەر ئاھالىلىرى بۇنىڭدىن كېيىن ناۋادا ئۆزلىرى تۇرۇشلۇق رايوندىكى مەھەللە سەھىيە مۇلازىمەت ئورگانلىرىدا تۇنجى قېتىم داۋالانماي تۇرۇپلا، ئۆز ئالدىغا بەلگىلەنمىگەن دوختۇرخانىلارغا بېرىپ داۋالانماقچى بولسا، داۋالاش ھەققىنى شۇ شەخس ئۆزى ئۈستىگە ئالىدۇ.

     يېقىندا يولغا قويۇلغان ‹‹ ئۈرۈمچى شەھىرىنىڭ شەھەر–بازار ئاھالىلىرى ئىچىدىكى ئاساسىي داۋالىنىش سۇغۇرتىسىغا قاتناشقانلارنى تۇنجى داۋالاش شۇنداقلا باشقا دوختۇرخانىلارغا يوللاشنى ۋاقىتلىق يولغا قويۇش چارىسى›› دا يەنە مۇنداق دەپ بەلگىلەندى: سۇغۇرتىغا قاتناشقۇچىلار ئەگەر خەتەرلىك ئەھۋاللارغا يولۇقۇپ، ئۆزلىرى تاللىغان مەھەللە سەھىيە مۇلازىمەت ئورگىنىغا بېرىپ داۋالانمىسا ياكى بىر دەرىجە يۇقىرى بەلگىلىگەن داۋالاش ئورگانلىرىغا بېرىپ جىددىي دىئاگنۇز قويدۇرۇپ بالنىتسىدا ياتسا، جەزمەن جىددىي داۋالىنىش رەسمىيەتلىرىنى ئېلىۋېلىشى كېرەك. بالنىتسىدا ياتقاندىن كېيىنكى بەش كۈن ئىچىدە، ئۆزلىرى تاللىغان مەھەللە سەھىيە مۇلازىمەت ئورگانلىرىغا بېرىپ، باشقا دوختۇرخانىلارغا يۆتكىلىش رەسمىيەتلىرىنى تولۇقلاپ بېجىرىشى كېرەك.

     ئىگىلىنىشىچە: ئۈرۈمچى شەھىرىدە نۆۋەتتە 137 مەھەللە سەھىيە مۇلازىمەت ئورگىنى شەھەر ئاھالىلىرىنىڭ تۇنجى داۋالىنىشىدىكى بەلگىلىگەن داۋالاش ئورگىنى قىلىپ بېكىتىلگەن.