ﺋﺎﺋﯩﻠﻪ ﺋﻪﺯﺍﻟﯩﺮﻯ ﺋﺎﺭﯨﺴﯩﺪﺍ ﺩﻭﺳﺘﻠﯘﻕ ، ﺋﯜﻟﭙﻪﺗﻠﯩﻚ ﮬﯚﻛﯜﻡ ﺳﯜﺭﯛﺷﻰ ﻛﯧﺮﻩﻙ . ﺋﺎﺋﯩﻠﻪ ﺋﻪﺯﺍﻟﯩﺮﻯ ﺋﺎﺭﯨﺴﯩﺪﺍ ﺋﯜﻟﭙﻪﺗﻠﯩﻚ ، ﻣﯘﮬﻪﺑﺒﻪﺕ ﻗﺎﻟﻤﯩﺴﺎ ، ﭘﯜﺗﯜﻥ ﺩﯗﻧﻴﺎﻧﻰ ﯞﻩﮬﯩﻤﯩﮕﻪ ﺳﯧﻠﯩﭗ ﺗﯘﺭﻏﺎﻥ ﻛﯜﭼﻠﯜﻙ ﺩﯙﻟﻪﺗﻠﻪﺭ ، ﺯﯙﮬﺮﻩﺗﻨﯩﯔ ﻳﯘﻗﯩﺮﻯ ﺩﻩﺭﯨﺠﯩﺴﯩﺪﻩ ﺗﯘﺭﻏﺎﻥ ﻣﯩﻠﻠﻪﺗﻠﻪﺭﻣﯘ ﺋﯩﻨﻘﯩﺮﺍﺯﻏﺎ ﺋﯘﭼﺮﺍﻳﺪﯗ . ﺋﯜﻟﭙﻪﺗﺴﯩﺰﻟﯩﻚ ﺳﻪﯞﻩﺑﯩﺪﯨﻦ ﺑﯘﻧﺪﺍﻕ ﺩﯙﻟﻪﺗﻠﻪﺭ ﭘﯘﺕ ﺗﯩﺮﻩﭖ ﺗﯘﺭﺍﻟﻤﺎﻳﺪﯗ . ﺷﯘﻧﺪﺍﻕ ﺋﯩﻜﻪﻥ ، ﺋﺎﺭﯨﺪﺍ ﺋﯜﻟﭙﻪﺗﭽﯩﻠﯩﻚ ﺑﻮﻟﻤﯩﺴﺎ ، ﺋﺎﺋﯩﻠﻪ ﻗﺎﻧﺪﺍﻕ ﭘﯘﺕ ﺗﯩﺮﻩﭖ ﺗﯘﺭﺍﻟﯩﺴﯘﻥ ؟ ﺋﺎﺭﯨﻐﺎ ﺩﯛﺷﻤﻪﻧﻠﯩﻚ ﯞﻩ ﻣﯧﮭﯩﺮﺳﯩﺰﻟﯩﻚ ﭼﯜﺷﻜﻪﻧﺪﯨﻦ ﻛﯧﻴﯩﻦ ﺋﯜﻟﭙﻪﺗﭽﯩﻠﯩﻜﻨﻰ ﺟﺎﻳﯩﻐﺎ ﻛﻪﻟﺘﯜﺭﻣﻪﻙ ﻣﯜﺷﻜﯜﻝ ﺑﻮﻟﻐﺎﻧﻠﯩﻘﺘﯩﻦ ، ﺋﯜﻟﭙﻪﺗﺴﯩﺰﻟﯩﻜﻨﯩﯔ ﺳﻪﯞﻩﺑﻠﯩﺮﯨﻨﻰ ﺑﺎﺷﺘﯩﻼ ، ﻗﯩﺴﻘﺎ ﯞﺍﻗﯩﺖ ﺋﯩﭽﯩﺪﻩ ﻳﻮﻗﺎﺗﻤﺎﻕ ﻻﺯﯨﻢ . ﺑﺎﺷﺘﺎ ﮬﻪﺭ ﻗﺎﻧﺪﺍﻕ ﻧﻪﺭﺳﻪ ﺋﺎﺟﯩﺰ ﺑﻮﻟﻐﺎﻧﻠﯩﻘﺘﯩﻦ ﺋﯘﻧﻰ ﺑﻮﻳﺴﯘﻧﺪﯗﺭﯗﺵ ﺋﺎﺳﺎﻧﺪﯗﺭ .

   ﺋﯜﻟﭙﻪﺗﭽﯩﻠﯩﻚ ﯞﻩ ﻣﯘﮬﻪﺑﺒﻪﺗﻜﻪ ﻳﯧﻘﯩﻦ ﺗﯘﺭﻣﺎﻕ ﮬﻪﻣﻤﯩﺪﯨﻦ ﺋﺎﯞﯞﺍﻝ ﺋﺎﺋﯩﻠﻪ ﺑﺎﺷﻠﯩﻘﻠﯩﺮﯨﻐﺎ ﺯﯙﺭﯛﺭﺩﯗﺭ . ﺋﻪﮔﻪﺭﺩﻩ ﺋﯘﻻﺭ ﺑﯘ ﮬﻪﻗﺘﻪ ﺋﯚﺭﻧﻪﻙ ﺑﻮﻟﺴﺎ ، ﺑﺎﺷﻘﯩﻼﺭ ﺋﯘﻻﺭﻏﺎ ﺋﻪﮔﯩﺸﯩﺪﯗ .

   ﺋﻪﻗﯩﻠﻠﯩﻖ ﺋﺎﻳﺎﻝ ﺋﯧﺮﯨﻨﯩﯔ ﺋﺎﺗﺎ - ﺋﺎﻧﯩﺴﯩﻐﺎ ، ﻳﯧﻘﯩﻦ ﻗﯧﺮﯨﻨﺪﺍﺷﻠﯩﺮﯨﻐﺎ ، ﺧﯘﺳﯘﺳﻪﻥ ﺋﯚﺯﯨﻨﯩﯔ ﺑﺎﻟﯩﻠﯩﺮﯨﻐﺎ ﯞﻩ ﻛﯧﻠﯩﻨﻠﯩﺮﯨﮕﻪ ﮬﻪﺭ ﯞﺍﻗﯩﺖ ﻣﯘﮬﻪﺑﺒﻪﺕ ، ﺋﻪﺩﻩﭖ ﺑﯩﻠﻪﻥ ﻣﯘﺋﺎﻣﯩﻠﻪ ﻗﯩﻠﯩﺪﯗ . ﺋﻪﺭﻧﯩﯔ ﻳﯧﻘﯩﻨﻠﯩﺮﯨﻐﺎ ﮬﯚﺭﻣﻪﺕ ﻗﯩﻠﻤﺎﻕ ﺋﻪﺭ ﺑﯩﻠﻪﻥ ﮔﯜﺯﻩﻝ ﻣﯘﻧﺎﺳﯩﯟﻩﺕ ﻗﯩﻠﯩﺸﻘﺎ ﺳﻪﯞﻩﺏ ﺑﻮﻟﯩﺪﯗ . ﺋﯧﺮﯨﻨﯩﯔ ﻳﯧﻘﯩﻨﻠﯩﺮﯨﻐﺎ ﮬﯚﺭﻣﻪﺕ ﻗﯩﻠﻐﯘﭼﻰ ﺋﺎﻳﺎﻝ ﺋﯧﺮﯨﺪﯨﻦ ﮬﯚﺭﻣﻪﺕ ﻛﯚﺭﯨﺪﯗ .

   ﺑﻪﺯﻯ ﺋﺎﻳﺎﻟﻼﺭ ﺋﺎﺯﻏﯩﻨﻪ ﺳﻪﯞﻩﺑﻠﻪﺭﻧﻰ ﺑﺎﮬﺎﻧﻪ ﻗﯩﻠﯩﭗ ﻗﯩﺰﻟﯩﺮﻯ ﺑﯩﻠﻪﻥ ﻛﯜﻳﺌﻮﻏﯘﻟﻠﯩﺮﻯ ، ﺋﻮﻏﯘﻟﻠﯩﺮﻯ ﺑﯩﻠﻪﻥ ﻛﯧﻠﯩﻨﻠﯩﺮﻯ ﺋﺎﺭﯨﺴﯩﻨﻰ ﺑﯘﺯﯨﺪﯗ . ﺑﯘ ﺋﻪﭘﺴﯘﺳﻠﯩﻨﺎﺭﻟﯩﻖ ﮬﺎﻟﺪﯗﺭ ، ﺋﯘﻻﺭﻧﯩﯔ ﯞﻩﺯﯨﭙﯩﻠﯩﺮﻯ ﺑﯘﺯﯗﻟﻐﺎﻥ ﺋﺎﺋﯩﻠﯩﻠﻪﺭﻧﻰ ﺗﯜﺯﯨﺘﯩﺶ ﺑﻮﻟﯘﭖ ﺗﯘﺭﯗﭖ ، ﺗﯜﺯﯛﻙ ﺋﺎﺋﯩﻠﯩﻠﻪﺭﻧﻰ ﺑﯘﺯﯗﭖ ﺑﻪﺧﺘﺴﯩﺰﻟﯩﻜﻜﻪ ﺳﻪﯞﻩﭖ ﺑﻮﻟﯘﺷﻠﯩﺮﻯ ﺟﯩﻨﺎﻳﻪﺕ ﯞﻩ ﯞﻩﮬﺸﯩﻴﻠﯩﻜﺘﯘﺭ .

 ﺋﻪﺩﻩﭖ - ﺋﻪﺧﻼﻕ ﻣﯩﺰﺍﻧﻠﯩﺮﯨﺪﯨﻦ ئېلىندى