شىنخۇا تورى ياپونىيە 7 – ئىيۇل تېلېگراممىسى : دۆلەت رەئىسى خۇ جىنتاۋ  ياپونىيىدە ئۆتكۈزۈلىدىغان سەككىز دۆلەت باشلىقلىرى يىغىنغا قاتنىشىش ئۈچۈن 7 – ئىيۇل شۇ جاي ۋاقتى سائەت 20 دىن 40 مىنۇت ئۆتكەندە ، ياپونىيىنىڭ خوككايدۇ ئارىلىغا باردى . ياپونىيىنىڭ تاشقى ئىشلار ئەمەلدارى ۋە خوككايدودىكى يەرلىك ئەمەلدارلار شۇنداقلا جۇڭگونىڭ ياپونىيىدە تۇرۇشلۇق باش ئەلچىسى ۋە ئەلچىخانا خىزمەتچىلىرى ئايرودرومدا خۇ جىنتاۋنى قىزغىن كۈتۈۋالدى .

    ئىگىلىنىشچە ، بۇ دۆلەت رەئىسى خۇ جىنتاۋنىڭ بەشىنچى قېتىم سەككىز دۆلەت باشلىقلىرى يىغىنغا قاتنىشىشى بولۇپ ، خۇ جىنتاۋ يىغىن مەزگىلىدە ، جۇڭگو ، ھىندىستان ، برازىلىيە ، جەنۇبىي ئافرىقا ، مېكسىكا قاتارلىق تەرەققىي قىلىۋاتقان بەش دۆلەت رەھبەرلىرىنىڭ كوللېكتىپ ئۇچرىشىغا قاتنىشىدىكەن .

     سەككىز دۆلەت باشلىقلىرى يىغىنى 7 – ئىيۇلدىن 9 – ئىيۇلغىچە ئۆتكۈزۈلىدىغان بولۇپ ، بۇ قېتىمقى يىغىندا  دۇنيانىڭ ئىقتىسادىي ۋەزىيىتى ، ھاۋا كىلمات ئۆزگىرىشى ، ئاشلىق بىخەتەرلىكى ، مىڭ يىللىق تەرەققىيات نىشانى قاتارلىق مەسىلىلەر ئاساسلىق مۇزاكىرە قىلىنىدىكەن .